想飛的心情

台灣是寶島
會記得細漢的時陣，著捌聽歷史老師講
佇十六世紀的時，葡萄牙的船隻，經過台灣海面的時～～
看著島上高山峻嶺，山明水秀，美麗的風景
忍勿會牢就按爾，大聲喝出－Formosas！
意思是講：「啊！美麗之島」
所以
咱台灣是「美麗的寶島」
這個好名是頂港有名聲，下港有出名，世界通人攏知影，逐家攏嘛呵咾徦會觸舌
台灣主要的山脈有-----
中央山脈、玉山、雪山、阿里山、海岸山脈、花東縱谷茲的山脈
山嶺相疊，溪谷相連，對低海拔到高海拔～～
有熱帶雨林、闊葉林、混生林、針葉林，佮高山、寒原等等
島嶼西爿是台灣海峽，東爿佮北爿是太平洋，南爿接巴士海峽
南北長、東西窄，面積大約有三萬六千平方公里
四邊攏倚海，佇亞熱帶，氣溫高、雨水擱濟
毋管佇水域抑是平地，生態環境攏誠複雜
呣但～～
有真豐富的海洋資源，嘛有誠稀奇的禽野獸
台灣黑熊、水鹿、山羌、台灣彌猴、台灣雲豹、麝香貓、紫斑尾蝶
、珊瑚、鰻仔魚、石斑、台灣鯛、台灣尾蝶
螺仔殼的加工，佇五、六十年代，帶領咱台灣加工業起飛
佮咱佇國際得著尾蝶王國的好名聲
外銷日本鰻仔魚、香蕉、甘蔗攏是台灣佇國際輝煌的好成績，予咱感覺真驕傲的事誌
台灣，呣但是寶島，嘛是一個仙島
，有真濟美麗的故事塊咧流傳，
日本時代，也佫將台灣米佮日本米栽培做新的品種，共茲種米號做蓬萊米（因為人亻因 講台灣是蓬萊仙島
咱祖先無惜艱難，對唐山經過黑水溝，過海來台灣～～
開墾，扑拼，佇茲生根發葉，勤勤儉儉，勞苦累積，予咱茲的後代過著富裕的生活
，人講台灣錢淹腳目，茲感謝咱祖先的庇蔭，佮天公賜予咱的福氣
人講食果子著要拜樹頭，因為科技的發展，幫助各種產業技術提高
呣管是農家，養殖產業的技術，攏受著肯定，茲是咱台灣的光榮
咱的農業隊出國去共人指導受著國際的重視
台灣
呣但人媠、婟嫢佫善良，會使講是地靈人傑
呣佫嘛有一寡生理人，為著家己的利益，無顧自然環境
共寶貴的樹仔剉做杉仔箍，挈去做藝術品，雕刻傢俱樹仔剉掉換種一寡較經濟的作物
像檳榔，呣但破壞環境，擱產生出檳榔西施的文化，實在是無捨施
攏無去想著茲的樹仔會當替咱檔偌濟土，把偌濟水
著按爾
每一擺若風颱期著會崩山，若地動著會走山
人民的生命財產受著足大的威脅
茲是大自然對咱一種無聲的抗議，是人為帶予寶島的災難
枉費上天賜予咱茲个好所在
呣通因為咱一時的貪念，煞來共環境破害了了
希望咱會當惜福，愛護上蒼賜予咱的茲个好所在
用心共伊惜共伊尊重，確實做好環保，維護這塊Formosas！
予台灣誠做是地球上永遠的Formosas！我的演講著講到茲，多謝各位！